ബ്ലഡ് പ്രഷര്‍(രക്ത സമ്മര്‍ദ്ദം) എപ്പോഴും നിശബ്ദ കൊലയാളിയായിട്ടാണ് പ്രത്യക്ഷപ്പെടുന്നത്. ഹൃദയം, തലച്ചോറ്, വൃക്കകള്‍, ധമനികള്‍ എന്നിവയെ മുന്നറിയിപ്പില്ലാതെ തകരാറിലാക്കുന്ന ഒരു മാരകമായ അവസ്ഥയാണ്. രക്താതിമര്‍ദ്ദത്തിന്റെ അപകടാവസ്ഥയും വര്‍ദ്ധിച്ചുവരുന്ന കേസുകളും കണക്കിലെടുത്ത്, അമേരിക്കന്‍ ഹാര്‍ട്ട് അസോസിയേഷനും (AHA) അമേരിക്കന്‍ കോളേജ് ഓഫ് കാര്‍ഡിയോളജിയും (ACC) രക്തസമ്മര്‍ദത്തെക്കുറിച്ചുള്ള പ്രധാന കാര്യങ്ങളും അത് എങ്ങനെ കൈകാര്യം ചെയ്യണമെന്നും വിശദീകരിക്കുന്ന പുതിയ മാര്‍ഗനിര്‍ദ്ദേശങ്ങള്‍ പുറത്തിറക്കിയിട്ടുണ്ട്.
എന്താണ് ഉയര്‍ന്ന രക്തസമ്മര്‍ദ്ദം
രക്തത്തിന്റെ ശക്തി ധമനികളുടെ ഭിത്തികളില്‍ അമര്‍ത്തുമ്പോഴാണ് ഉയര്‍ന്ന രക്തസമ്മര്‍ദ്ദം ഉണ്ടാകുന്നത്. മുകളിലെ സംഖ്യ (സിസ്റ്റോളിക്) എന്നും താഴെയുള്ള സംഖ്യ (ഡയസ്റ്റോളിക്) എന്നും രണ്ട് സംഖ്യകള്‍ ഉപയോഗിച്ചാണ് രക്തസമ്മര്‍ദ്ദം അളക്കുന്നത്.
എത്രയും വേഗം നടപടിയെടുക്കുന്നുവോ അത്രയും വേഗം പരിഹാരം ലഭിക്കും
ഉയര്‍ന്ന രക്തസമ്മര്‍ദ്ദം തലച്ചോറിന്റെ ആരോഗ്യവുമായി ബന്ധപ്പെട്ടിരിക്കുന്നു. ഇത് തലച്ചോറിനെ ബാധിക്കുകയും ഡിമെന്‍ഷ്യയ്ക്ക് സാധ്യത വര്‍ദ്ധിപ്പിക്കുകയും ചെയ്യും. രക്തസമ്മര്‍ദ്ദത്തിലെ ചെറിയ വര്‍ദ്ധനവ് പോലും ഓര്‍മ്മശക്തിയെ ഇല്ലാതാക്കും. രക്തസമ്മര്‍ദ്ദം കണക്കാക്കാന്‍ 130 mm Hg യില്‍ താഴെ എന്ന പുതിയ (മുകളിലെ സംഖ്യ) അളവാണ് അസോസിയേഷന്‍ ഇപ്പോള്‍ നിര്‍ദ്ദേശിക്കുന്നത്.
പക്ഷാഘാത സാധ്യത വര്‍ദ്ധിക്കുന്നു
ഹൃദയാഘാതം ഉണ്ടാകാനുളള പ്രധാന അപകട ഘടകങ്ങളിലൊന്നാണ് ഉയര്‍ന്ന രക്തസമ്മര്‍ദ്ദം. പുതുക്കിയ മാര്‍ഗനിര്‍ദ്ദേശമനുസരിച്ച് 140/90 mm Hg അല്ല, 130/80 mm Hg ആണ് പുതിയ നോര്‍മല്‍ വാല്യു.
സംഖ്യകള്‍ ഒരു വലിയ പങ്ക് വഹിക്കുന്നു
രക്തസമ്മര്‍ദ്ദത്തെ ആറ് പ്രധാന വിഭാഗങ്ങളായി തിരിച്ചിരിക്കുന്നു: സാധാരണ (120 ല്‍ താഴെ), ഉയര്‍ന്നത് (120-129), ഘട്ടം 1 രക്താതിമര്‍ദ്ദം (130-139), ഘട്ടം 2 രക്താതിമര്‍ദ്ദം (140 അല്ലെങ്കില്‍ അതില്‍ കൂടുതല്‍), കഠിനമായ രക്താതിമര്‍ദ്ദം (180 ല്‍ കൂടുതല്‍), രക്താതിമര്‍ദ്ദ അടിയന്തരാവസ്ഥ (180 ല്‍ കൂടുതല്‍).
ജീവിതശൈലി മാറ്റങ്ങള്‍
നോര്‍മലായ രീതിയില്‍ രക്തസമ്മര്‍ദ്ദമുള്ളവര്‍ക്ക് രക്തസമ്മര്‍ദ്ദം ക്രമീകരിക്കാന്‍ ചെറിയ മാറ്റങ്ങള്‍ മാത്രമേ ആവശ്യമുള്ളൂ. ഇത്തരക്കാര്‍ക്ക് മരുന്നുകളുടെ ഉപയോഗം ഒഴിവാക്കി ജീവിതശൈലിയില്‍ ചെറിയ മാറ്റങ്ങള്‍ കൊണ്ടുവന്നാല്‍ രക്തസമ്മര്‍ദ്ദം ക്രമീകരിക്കാന്‍ സാധിക്കും. കഠിനമായ തലവേദന, കാഴ്ചയിലെ മാറ്റം, വയറുവേദന, നെഞ്ചുവേദന അല്ലെങ്കില്‍ ശ്വാസതടസ്സം തുടങ്ങിയ അപകട ഘടകങ്ങള്‍ ഉണ്ടാകുന്നില്ലെങ്കില്‍ ജീവിതശൈലിയിലെ മാറ്റങ്ങള്‍ പ്രയോജനം ചെയ്യും.
ജീവിതശൈലിയില്‍ എന്തൊക്കെ മാറ്റങ്ങള്‍
ഉപ്പ് കഴിക്കുന്നത് ശ്രദ്ധിക്കുക. മുതിര്‍ന്നവര്‍ പ്രതിദിനം ഏകദേശം 2300 മില്ലിഗ്രാമോ അതില്‍ കുറവോ ഉപ്പ് കഴിക്കണം (അതായത് ഏകദേശം 1 ടീസ്പൂണ്‍ ഉപ്പ് അല്ലെങ്കില്‍ അതില്‍ കുറവ്).സോഡിയം കുറവുള്ളതും പച്ചക്കറികള്‍, ധാന്യങ്ങള്‍, പയര്‍വര്‍ഗ്ഗങ്ങള്‍, പഴങ്ങള്‍, മെലിഞ്ഞ പ്രോട്ടീന്‍ എന്നിവയുടെ ഗുണങ്ങള്‍ അടങ്ങിയതുമായ ഭക്ഷണങ്ങള്‍ കഴിക്കുക. മദ്യം കഴിക്കുന്നത് പരിമിതപ്പെടുത്തുക.
ഗര്‍ഭകാലത്തെ രക്തസമ്മര്‍ദ്ദം
ഗര്‍ഭാവസ്ഥയിലോ അതിനു ശേഷമോ ഉയര്‍ന്ന രക്തസമ്മര്‍ദ്ദം ഉണ്ടാകാന്‍ സാധ്യതയുണ്ട്. ഗുരുതരമായ അവസ്ഥ എന്ന് വിളിക്കപ്പെടുന്ന പ്രീക്ലാമ്പ്‌സിയ ഉള്‍പ്പെടെ. ചികിത്സാ ഓപ്ഷനുകളെക്കുറിച്ച് സംസാരിക്കാന്‍ ഒരു മെഡിക്കല്‍ പ്രൊഫഷണലിനെ സമീപിക്കുക.
യുവാക്കളെ ബാധിക്കുന്ന രക്തസമ്മര്‍ദ്ദം
ആര്‍ക്കും ഉയര്‍ന്ന രക്തസമ്മര്‍ദ്ദം ഉണ്ടാകാം. പ്രായമായവര്‍ക്കോ ആരോഗ്യമില്ലാത്തവര്‍ക്കോ മാത്രമല്ല കുട്ടികള്‍, യുവാക്കള്‍, മുതിര്‍ന്നവര്‍, പ്രായമായവര്‍ എന്നിങ്ങനെ എല്ലാ പ്രായത്തിലുമുള്ള ആളുകളും പതിവായി പരിശോധനകള്‍ നടത്തേണ്ടതാണ്. മോശം ജീവിതശൈലിയാണ് രക്തസമ്മര്‍ദ്ദം ഉയരുന്നതിന് കാരണം.
ഭാരം കുറയ്ക്കണം
ഒരാള്‍ക്ക് അമിതഭാരമോ പൊണ്ണത്തടിയോ ഉണ്ടെങ്കില്‍, ഏകദേശം 5% ഭാരം കുറയ്ക്കുന്നത് ഉയര്‍ന്ന രക്തസമ്മര്‍ദ്ദം കുറയ്ക്കാനോ തടയാനോ സഹായിക്കും. അധിക ഭാരം ചുമക്കുന്നത് അവയവങ്ങള്‍ക്കും ഹൃദയത്തിനും കൂടുതല്‍ സമ്മര്‍ദ്ദം ചെലുത്തുന്നു. ഇത് കാലക്രമേണ പൊണ്ണത്തടിയുള്ള വ്യക്തികളില്‍ രക്തസമ്മര്‍ദ്ദം വര്‍ദ്ധിപ്പിക്കും.
DASH-ശൈലിയിലുള്ള ഭക്ഷണരീതി സ്വീകരിക്കുക
DASH ഡയറ്റ് എന്നാല്‍ ഹൈപ്പര്‍ടെന്‍ഷന്‍ തടയുന്നതിനുള്ള ഭക്ഷണരീതികള്‍ എന്നാണ് അര്‍ത്ഥം. ഉയര്‍ന്ന രക്തസമ്മര്‍ദ്ദമുള്ളവര്‍ക്ക് വേണ്ടിയുള്ള ആരോഗ്യകരമായ ഭക്ഷണക്രമം എന്നാണ് ഈ ഡയറ്റിനെ അടിസ്ഥാനപരമായി വിളിക്കുന്നത്. പൊട്ടാസ്യം, കാല്‍സ്യം, മഗ്‌നീഷ്യം തുടങ്ങിയ പോഷകങ്ങള്‍ അടങ്ങിയ ഭക്ഷണങ്ങളിലാണ് ഈ ഡയറ്റ് ശ്രദ്ധ കേന്ദ്രീകരിക്കുന്നത്. ഇത്തരം ഡയറ്റുകള്‍ ചെയ്യുന്നതിന് മുമ്പ് ഒരു ഡോക്ടറുടെ സേവനം തേടേണ്ടതാണ്.
(ഈ ലേഖനം വിവരങ്ങള്‍ നല്‍കുന്നതിന് വേണ്ടിയുള്ളതാണ്. ആരോഗ്യസംബന്ധമായ പ്രശ്‌നങ്ങള്‍ ഉളളവര്‍ ഒരു ഡോക്ടറുടെ സേവനം തേടേണ്ടതാണ്)
Content Highlights :How to manage blood pressure, here are the new guidelines